Kòrsou, 11 di febrüari 2008
Komunikado di prensa
Ku potrèt

Mester bin lei pa akseso di kachónan di guia
Segun meta di Fundashon Laura and Wagner

Willemstad – Un lei pa pèrmití akseso di kachónan di guia den tur lugá i konsientisashon di komunidat pa akseptá kachónan di guia. Esei tabata mensahe di Fundashon Laura and Wagner (Laura and Wagner Foundation – LWF) kual fundashon a keda lantá djaluna último riba inisiativa di Laura de Haseth-Meddens. Dor di guia di su kachó spesial Wagner, Laura kende tin un desabilidat visual, a logra ku e por funshoná mas normal posibel den bida.

Laura de Haseth-Meddens a kuminsá pèrdè mayoria di su bista 12 aña pasá. Ku yudansa di su famia i amigunan e por a kontinuá ku su bida mas tantu posibel manera tabata e kaso promé ku el a haña su desabilidat. Sinembargo tabata despues ku el a logra na haña su kachó Wagner via di eorganisashon 'The Seeing Eye' na Morristown, New Jersey na Merka pa $150, ku el a logra un mihó oportunidat pa hasi loke e ke i mester. E organisashon ‘The Seeing Eye’ a paga tur su gastunan di pasashi, entrenamentu i pa e haña un kachó di guia.

Ku lantamentu di Fundashon Laura and Wagner ta bai traha awor riba metanan pa logra aksesibilidat pa tur hende ku tin desabilidat visual pa nan por yega na un kachó manera Wagner ku por guianan pa nan por funshoná den komunidat i sali for di isolashon i soledat.

Meta prinsipal di LWF ta pa yega na lei ku ta protehá derechi humano i independensia di hendenan ku tin desabilidat visual òf ku ta siegu kompletamente; organisá i produsí  konferensha i programanan den medionan di komunikashon ku mester ta edukativo, rekreativo i vokashonal i krea rekurso pa duna hendenan ku desabilidat visual oportunidat pa nan desaroyá nan mes i biba independiente; kordiná desaroyo di un komunidat i ambiente di trabou ku ta sostené i promové integrashon di hendenan ku desabilidat visual i duna nan oportunidat pa traha i pa entrená nan mes i promové den transporte públiko opshonnan pa hendenan ku desabilidat visual por ta movibel.

Durante di e konferensha di prensa djaluna atardi pa presentá ofisialmente Fundashon Laura and Wagner a presentá tambe direktiva di e fundashon. Presidente ta Reyna Joe, vise presidente Laura de Haseth-Meddens, sekretario ta Juanita Cijntje, segundo sekretario ta Manielle de Aldrey-Stoop i tesorero ta Tesha Yung.

Tambe a mustra un video di e organisashon ‘The Seeing Eye’ mustrando asina esfuersonan ku ta tumando lugá for di aña 1929 na Merka pa entrená kachónan di guia pa hendenan ku desabilidat visual. LWF ta spera ku logrando nan meta nan lo yuda tur hende ku tin desabilidat visual den koperashon ku tur ku ta trahando pa yuda hende ku desabilidat visual.

Pa mas informashon riba kachónan di guia i proyektonan di LWF por bishitá riba internèt www.lauraandwagner.com òf tuma kontakto na info@lauraandwagner.com òf na telefòn nr. 660-4411.